SUSMARYOSEP, Ang init!

Tag-init na!  At habang umuulan na sa Pinas at sunod-sunod nang pumapasok ang mga bagyo at nagbabantang umapaw ang mga dam (wag naman sana) e tagaktak naman ang pawis naming mga kabayan dito sa Dubai (Tagaktak n. dripping of sweat; shedding of tears; downpour #EksenangDictionary).  At bago ko simulang ishare ang mga summer experiences and escapades  dito e alamin muna natin ang climate ng Dubai (Kuya Kim, pasok!).

Mas mahaba ang tag-init sa bansang ito kumpara sa tag-lamig.  Sabi ko nga sa previous articles ko na nagsisimulang magparamdam ang init pagpasok ng May or minsan as early as April.  At magsisimula naman ang taglamig pagpasok pa ng November or December.  Pinakamalamig ko nang naranasan ang 10°C (na minsan e mas mababa pa daw) at pinakamainit ang halos 50°C (grabe!).  Umuulan sa Dubai pero kung pagsasama-samahin ko ang ulan sa buong taon e baka pang isa o dalawang araw lang ito in total (nagtitipid?).  Para sa mas malawak na kaalaman ukol dito, please welcome my friend, wikipedia - http://en.wikipedia.org/wiki/Climate_of_Dubai.

Entering Satwa habang sinasalubong ng DSS logo

Nakakatawang isipin na kapag umabot ng 35°C and temperature sa Pinas e madalas na tayong magreklamo na di na kakaynin ang init, na bubuksan na ang lahat ng electric fan at aircon, na magsasando o maghuhubaran na ang lahat (magbra ka ate) at kung ano-ano pang reklamo.  Hanggang makarating ako ng Dubai at maexperience ko ang “totoong init” (may peke na naman ba? Pati ba init may imitation na rin?).  Imagine 40°C paggising mo pa lang at 35°C bago ka matulog.  Susmaryosep.  And to think that we need to walk siyempre pag papasok at pauwi ng bahay or kung may bibilhin ka. Ok pa sana ang init pero yung humidity ang minsang nagpapahirap ng sitwasyon. Akala mo e nasa loob ka ng pugon (pandesal?) na humahampas (walis?) sa mukha mo ang init. Yan ang totoo.  E ano ba namang magagawa namin e disyerto ang Dubai na pinaunlad lamang at tinayuan ng nagtatayugang mga gusali.  At dahil nga sa sitwasyong ito e siyempre naka aircon ang lahat ng bahay (sosyal).  Hindi pwedeng wala or else patay kang bata ka.  So kaunting lakad sa init, sakay sa airconditoned na bus or train or taxi, baba at lakad sa init hanggang makarating ng office na may aircon na uli.  Pwedeng ding pumasok sa loob ng mall kahit as early as 6AM. Hindi bawal dito pati sa mga building para lang tumawid sa loob at makaramdam ng lamig.  Hindi din bawal yan dito. Naalala ko tuloy na bawal yan sa Ortigas. Pag nakidaan ka sa loob ng building e haharangin ka ng guard!  Kaya tuloy di na ako naniniwala sa sabi ng matatanda na pag galing sa initan e wag agad papasok sa malamig or else magkakasakit. E di sana malaking ospital na ang Dubai kung tooto yun. E hindi naman pwedeng galing sa init e sa init na lang maghapon. Susmaryosep. 

Kapag tag-ulan, iisipin agad natin sa Pinas na masarap ang sabaw, bulalo, champorado na may tuyo, etc (namiss ko bigla L).  At halos ganyan din naman sa tag-init.  Papasok sa eksena ang buko juice, ice candy, sa malamig, sorbetes, halo-halo at maraming iba pa (mas lalo ko namiss L L).  Sinusubukan din naman naming labanan ang init (kontrabida?) sa maraming paraan (except paghuhubad. Bawal. Mahuhuli).  Sa paanong paraan nga ba nalilibang ang mga Pinoy sa Dubai pagsapit ng tag-init.  Ayan sa baba. Basa.

DSS

Modhesh (#PinoyPride)

Ano ba itong DSS na ito. SLR camera ba ito? Pasyalan? O natripan ko lang na gumawa ng acronym? DSS stands for Dubai Summer Surprises.  Korek! Mge eksena ng pangsorpresa by means of shopping.  Sa madaling salita, sale na walang pakundangan.  At kapag sinabi mong sale sa Dubai, totoong sale talaga (may peke ba?).  Ito ang bansang may sariling Shopping Festival taon-taon na dinadayo ng mga karatig bansa pati  mga taga Europa (#shopaholics).  Nagaganap ito ng around February every year for about a month.  Susunod naman ang DSS pagpasok ng summer na isang buwan din.  Susundan ito ng Ramadan Sale na isang buwan din. Susunod ang Eid Sale, Gitex at marami pang mga sale na masaya at masakit sa bulsa (#BestInSale2012).  Pero since DSS season ngayon, ito ang pag-usapan natin.

June nagsisimula ang DSS at malalaman mo ito kapag napadaan ka ng mga tulay na puno na ng announcement at banderitas (fiesta?).  Kapag napagawi ka naman sa bandang Satwa (lugar ito hindi ahas) e makikita mo sa round about ang ilaw na nagsasabing humanda ka na kase sale na (sana lang may pera).  At ang isa pang hudyat ng pagsisimula ng DSS ay ang paglabas ni Modhesh.  Siya ang official mascot ng shopping festivities na hindi ko mawari kung anong character ba ito.  Jack in the box daw (yung lumalabas sa kahon na nanggugulat pero di naman ako nagugulat) at marami pang characterization sabi ng iba.  Pero ang totoong nakakamanga about Modhesh e ang malaman na Pinoy pala ang nagdesign ditto (#SuperProud).  Para mas makilala pa si Modhesh basahin ito - http://www.dubaievents.ae/en/section/modhesh.

And since DSS is all about shopping and a lot of sale and discounts, pag-usapan natin kung ano nga ba ang madalas bilhin ng mga kabayan natin kapag ganitong season.

Pabango, lotion at marami pang pabango at lotion (#paulit-ulit #kaumay)

Madalas na maglaban ang Victoria’s Secret at Bath and Body Works kapag ganitong panahon ng harbatan sa benta (suntukan?).  Kung nabibili natin sa Pinas ang isang bote ng Victoria o Bath and Body ng halagang 500pesos pataas (o 600pesos hanggang 800pesos kapag hulugan depende sa tagal ng pagbabayad hanggang tumakbo na ang may utang at nasira na ang friendship), naglalaro naman sa AED25 or AED40 ang presyo nyan dito.  Sa mga gustong magconvert gamitin ninyo ito - http://themoneyconverter.com/. At kapag naman dumating ang DSS at iba pang more more sale moments, bumababa ang presyo sa AED5 or AED10 na ikinakaloka ng mga kabayan natin (kasama na ako) na talagang nagpapanic buying na akala mo e nasalanta ng bagyo na nag uunahang makabili ng bigas at de lata. Hindi alam kung paano pagkakasyahin sa cart ang pinamili! At ang sagot, mahal na kase sa susunod or ipapadala or itatagong pasalubong or ibebenta sa Pinas (tama din nga naman #NegoSyete).  Sa mga ayaw maniwala, ayan po ang picture ng mga pinsan kong nagpanic buying last week lang.

Electronic Gadgets

Ito ang talagang dinadayo ng maraming nilalang mula sa iba’t-ibang planeta.  Kapag sale naman kase e ramdam mo ang pagbaba ng presyo ng bonggang bongga.  Makakabili ka ng 32’ flat screen (wala na akong nakikitang CRT e yung TV na kuba) sa halagang AED800 na may libre pang plantsa or blender (kaloka).  Ito namang kaofficemate ko na pinagpala sa sale e nakabili ng 40’ LED Smart TV (yung pwedeng mag internet sa TV #kainggit), sa halagang AED2, 300 (na originally e AED3, 500) at may nakuha pang libreng Xbox at home theater system! Juice ko! Sila na ang nanalo sa harbatan!  At hindi nagpatalo ang pinsan ko na naman (hobby nila magshopping) na bumili naman ng laptop sa halagang AED1, 200 na may libreng external hard drive, external cd reader and writer, mouse, bag, at camera (#SobrangInggitNa).  Kasama din madalas sa sale ang mobile phones. Blackberry bold (yung basic) is currently at AED500 at marami pang phone na mura kasama na ang mga tablet (hindi gamot).  Ito yung ilan sa mga stores where you can find a lot of items on sale:

http://www.sharafdg.com/

-          Dito ka malilito sa dami ng gadgets na almost all the time e may promo.  Paborito naming puntahan yung mga items nila na sa “basket” na super bargain gaya ng 16gb usb na AED15 na lamang ang presyo.

http://www.jumbocorp.com/

-          Another gadget hub.  Hindi ka rin mauubusan ng choices sa tindahang ito.  At yung malaking branch nila e napakalapit sa bahay namin. 5 floors yata ito na gadget ang laman lahat.  Para kaming kinakawayan at nagsasabing “halika, mamili k at ubusin mo ang pera mo”, buti na lang di kami nakikinig sa kanya. Hmmmppp….

http://www.jackys.com/

-          Isa pa itong si Jacky’s na di ko mawari kung si Jacky Chan, Jackie Lou Blanco o si Jack and the Beanstalk ang may ari (#waley).  Sandamakmak din ang choices hanggang mailto ka na at di ka na bumili.

http://www.pluginselectronix.com/

-          Another electronic haven.  Dagdag pang-lito kapag naghahanap ka ng gadgets and electronic items.  Kagaya ng mga naunang nabanggit, marami silang branches all over the UAE sa iba’t-ibang mall at may mga sariling buildings at pwesto din.

Marami pang iba pero yan ang top 4 na nakapasok sa survey.  Try to browse and see the items.  Enjoy.

Damit, sapatos at iaba pang bagay na nasusuot

Another good thing about DSS and other promos in Dubai e yung mga mababang presyo ng damit at sapatos.  Dito ka makakakita ng super sale talaga na kahit di mo yata masusuot e bibilhin mo (#Harbatan2012).  E kase ba naman ang mga signature brands bumababa ng AED20 ang isa.  Kasama na din ang mga department stores sa loob ng malls gaya ng Forever 21, H&M, Bloomingdales, Galeries Lafayette, Splash, Center Point (hindi SM Sta. Mesa) and more.  Sa mga stores na yan din mismo nataranta ang Nanay ko sa pagbili ng bag na murang mura din naman talaga.  Sa mga stores din na yan kami madalas makabili ng t-shirt na worth AED20 lang ang isa (may collar o wala).  Isang experience naman naming sa panghaharbat e nang magsale ang isang shoe store last year na DSS where you can buy Vans and Pony shoes sa halagang AED90 lamang! Panic buying kaming magkakapatid sa sobrang mura.  At ngayong week na ito, nararamdaman ko na may magaganap na panic buying ng Lacoste at Converse dahil super sale sila. Hmmmmmm. Mukhang matutukso ako.

ATBP.

Hindi nawawala sa mga articles ko ang category na ATBP kase ang daming bagay na di mo mawari at maipaliwanag kahit anong usapan pa yan.  Kagaya na lang tuwing DSS kung saan hindi lamang gadgets, damit o sapatos ang pinagkakaabalahang bilhin ng lahat. Kasama na sa category na ito ang mga pasalubong at balikbayan box items gaya ng murang Pringles (na AED10 ang 4 na piraso), sabon (na AED10 ang 4 din na piraso), mga pagkain, relo, alahas, etc at maraming iba pa na part ng DSS.  Pero hindi lamang naman nakaconcentrate ang festival na ito sa shopping.  Marami din silang games, programs and shows para sa mga bata at sa buong pamilya.  Masaya ang DSS, lalo na kung may pera ka.

Pagkaing Pinoy

Wala pa ring tatalo sa pagkaing kinalakihan na natin at kinamulatan.  At hindi magpapaawat ang mga kabayan natin dito sa Dubai.  Sinong magsasabing sa Pinas lang kami makakatikim ng mga pamatid-uhaw na pagkain at mga kakanin na nagpapagdag saya sa tag-init at nagpapawala ng home sick panandalian? Sino! Lumabas kayo! Lumabas ang matapang!  Let me mention some of the favorites and where we usually buy them:

Halo-halo – Chowking ang unang papasok sa isip natin at yan din ang unang takbuhan namin dito sa Dubai.  Yes, may Chowking branches dito.  Marami silang branch na nagkalat all over Dubai at pwede din na magpadeliver.  Soon to open ang branch nila sa loob ng mall (first time sa mall) sa Deira City Center.  Ang presyo: AED16 ang Halo-halo Fiesta at AED18 ang Special (na dinagdagan lang ng Ice Cream na di ko gusto ang lasa).  May halo-halo din sa mga Pinoy Restaurants gaya ng Tipanan at Tagpuan pero sa susunod na natin sila pag-usapan (ang haba na). 

Sago at Gulaman o Gulaman at Sago (bahala na kung anong gusto mong mauna) – meron din sa Chowking kasama ng black gulaman pero paborito ko yung sa Satwa sa labas ng Westzone. AED5 or AED10 ang presyo depende sa laki.

Ice Cream – marami sa mga grocery stores at mall gaya ng London Dairy, Baskin-Robbins, Cold Stone, Dairy Queen, Dreyer’s Häagen-Dazs, the controversial Magnum, Twix, Maltesers at marami pang iba (sosyalan).  Pero hindi ito ang hinahanap-hanap ng mga Pinoy (lalo na ako).  Go pa rin ako for Selecta at Magnolia (forever favorite and Quezo Real at Quezo Primero).  Basta grocery store na may panindang Pinoy, meron nyan.  Mabibili ang 1.5L sa halagang AED25 (minsan AED20 pag malapit na maexpire).

Buko Juice and Fresh Juices – Madalas na nasa karton o lata ang mga ito.  Yung buko juice e nakapack na at preserved e nanggagaling ng Thailand at Indonesia (wala pa akong nakikitang galing Pinas pero paborito ko naman ang Calamansi Juice na nasa lata galing sa atin).  Makakabili ka din naman ng sariwang buko na madalas e galing sa India pero di sing sarap at sing tamis ng galing sa atin. Iba pa rin ang galing Pinas.

Kwek-kwek, Tokneneng, Fishball, Squidball, Kikiam, etc – pangtanggal inip, suya sa init at homesick.  Makakabili ka ng sangkap na ikaw na mismo ang magtitimpla at magluluto sa mga grocery na may Pinoy products.  Pero kung ang gusto mo e yung maramdaman mo na parang nasa pinas ka na tinutusok mo ito at pinapalutang sa tamis-anghang na sarsa, e meron din dito nyan sa Dubai.  Meron sa Karama Center, sa West Zone Satwa at marami pang iba.  AED10 ang presyo ng 5 pirasong kwek-kwek ganon din ang iba pa.  Kasama na din dito ang mga kakanin at pansit at palabok na madalas e AED10 nakapack na.  Paborito ko ang turon pero di ko marecommend ang Banana-Q. Ewan pero iba pa rin ang lasa ng galing sa sarili mong bayan. 

Summer season ang madalas na panahon para makapagbonding ang pamilya. Ito yung time ng outing, beach, gimik, meryendang sama-sama, fiesta, family reunions at marami pang kasiyahan.  Pero sa aming mga OFW sa Dubai, isa lamang itong ordinaryong panahon kung saan tuloy ang trabaho at ikot ng buhay.  Nadagdagan lamang ng sobrang init at sandamakmak na pawis pero tuloy ang laban.  Pero kahit na wala dito ang pamilya at mga mahal sa buhay, kahit walang piknik or outing sa beach, mananatili silang inspirasyon para patuloy na magpunyagi at mangarap.  Yan ang Pinoy, yan ang tatak OFW.

Photo Credits:

Google - salamat all the time for the photos

Nene and Koy for the panic buying pics